البداية صرخة
وصباع يشاور يقول :
مين أنا
الأرض ولاّ السما
ولا القمر حرساه نجومه
ولاّ نهر يسقى العطاشا
ولاّ بحر مالح
ما بتعرف حدوده
ولاّ جبل عالى
ولاّ ديب من دياب الفلا
مين أنا
بسمة طفل وليد
فرحان بحضن أمه
ولاّ آهة الألم
طالعه من صدر الجريح
مين أنا
لفحة شمس حارّة
فى نهار الصيف
أجرى أدّس
الاقى الخريف
فارد دراعاته
وألوان الطيف
محوطانى
بتهمس "ف" ودانى
رقمك مكتوب
"ف" كتاب سخيف
أنا الحروف المتبعترة
والدمع اللى بيسقى الخد
أنا ذكرة شهيد
ولاّ فرحه غايبه " ف" يوم العيد
أنا القلم
اللى سطر التاريخ
ولاّ واحد من الغنم
بأيد اللى
ما بيعرفش الحرام
السارق ضحكة الأيام
مين أنا
الظالم ولا المظلوم ؟
ولا بركان مكتوم
هايجيله يوم
ينفجر ..
يفتح بطن المستحيل
لاجل ما اشوف الحقيقة
لاجل ما اعرف
أنا انسان
ولاّكلمة "ف" الهوا .